Оргазм деген эмне?

I бѳлүк. Жалпы маалымат

●     Оргазм — бул сексуалдык дүүлүгүүнүн кульминациясы. Химиялык жактан алганда, мээде дофамин, окситоцин, пролактин жана эндорфиндердин концентрациясынын кѳбѳйүшү. Физиологиялык жактан — организмде аралыгы бир секундадан аз болгон тѳрттѳн онго чейинки жамбаш түбүнүн булчуӊдарынын жыйрылуусу.

●     Жыйрылуулардын бир топтому — бир оргазм. Ал кѳп учурда баштын, жамбаштын жана колу-буттун эрксиз кыймыл-аракеттери менен коштолот.

●     1980-жылдары Миннесота университети жүргүзгѳн изилдѳѳлѳр эркектер менен аялдарда булчуӊ дирилдѳѳлѳрүнүн ортосунда эч кандай техникалык айырмачылык болбогонун кѳрсѳткѳн. Бирок изилдѳѳнүн натыйжасында оргазм эки типте болору аныкталган.

●     I тип — болжол менен 20-30 секундага созулган үзгүлтүксүз жыйрылуулардын сериясы. II тип —сейрегирээк, бирок жалпысынан 30-90 секундага чейин созулган узун жыйрылуулар.

●     Эркектер менен аялдардын ортосунда булчуӊдук жыйрылуу жагынан айырмачылык жок, бирок эркектердин жана аялдардын оргазмында бар. Голландиялык окумуштуу Герт Хольстедж оргазмга жеткен адамдардын мээсинин тунук сүрѳттѳрүн алып, аялдардын оргазм учурунда кѳбүрѳѳк ырахат алып, транс абалына түшүүгѳ жѳндѳмдүү экенин аныктап чыккан.    

●     Балким, аял оргазмынын кѳбүрѳѳк сезилүүчү касиетке ээ экендиги жѳнүндѳ түшүнүк психикалык разрядка менен байланыштуу болсо керек. Аял жана эркек оргазмдарынын ортосундагы айырмачылыктар тууралуу кийинки посттордо кененирээк айтып беребиз.

●     Дагы бир кызыктуу нерсе – оргазмды бир гана адам баласы баштан ѳткѳрбѳйт. Таасир этүү механизми жагынан алганда, адамдагы оргазм сүт эмүүчүлѳрдѳгү, башка омурткалуу жана омурткасыз жандыктардагы оргазмга окшоп кетет. Маселен, приматтар, кемирүүчүлѳр, канаттуулар, сойлоп жүрүүчүлѳр, ал тургай балыктарда да окшош!

II бѳлүк. Эркек оргазмы

1. Эволюциялык жактан караганда эркектердин оргазмы

●     Оргазмдын да, жалпы эле секстин функцияларын аӊдап түшүнүү максатында окумуштуулар түрдүү жаныбарлардын жыныстык жүрүм-турумун изилдеп келишет. Бул жагынан адамдар ички уруктануу ѳзгѳчѳлүгүнѳ ээ жаныбарлардын түрлѳрүнѳ кѳбүрѳѳк окшош.

●     Албетте, эӊ кѳп окшоштук приматтарга — шимпанзе, бонобо, горилла жана башкаларга таандык. Бирок оргазм же болбосо ага окшош реакциялар башка сүт эмүүчүлѳрдѳ, айрыкча кемирүүчүлѳрдѳ, айрым канаттууларда, сойлоп жүрүүчүлѳр менен балыктарда байкалат.

●     Окумуштуулар оргазмдын пайда болуусунун башкы себеби катары, дененин ичинде энелик клетка менен сперматозоид биригип, тышкы уруктануунун ички уруктанууга, тирүүлѳй туулууга ѳтүүсүн  аташат. Анткени жыныстык клеткаларды, мисалы, икраны чачып же ага сүт чачып, суунун жээгине же түбүнѳ «салып коюу» мүмкүн болбогондуктан, энелик клетка менен сперматозоидди бири-бирине жеткирүүнүн башка механизми зарыл болгон.

●     Мына ошол механизм болуп оргазм эсептелет. Оргазм учурунда эркек жандыктын чандыр булчуӊдары менен ургаачы жандыктын жыныс коӊулунун/клоакасынын булчуӊдары жыйрылып, гаметалуу суюктуктар бири бирин кѳздѳй агып жѳнѳйт. Ошондуктан, оргазм эркектерде эякуляция менен коштолот. Ал эми аялдардагы оргазмда мындай функция дээрлик жок. 

●     Оргазмдын биринчи функциясы жѳнүндѳгү бул гипотезанын далилдеринин бири — сперманы иштеп чыгуу жана чыгаруу ишине катышкан простатанын сексуалдык сезгичтиги.

●     Оргазмдын, анын ичинде эркектердеги оргазмдын дагы экинчи функциясы – жупташуу үчүн сыйлык катары кызмат кылуу. Ички уруктануу тышкы уруктанууга салыштырмалуу кыйла татаалыраак. Анын үстүнѳ мындай түрдѳ тукум азыраак калмак. Бирок кошулуусунда дофамин иштелип чыккан жаныбарлар ѳз гендерин сактап калуу мүмкүнчүлүгүн жогорулата алышкан. Кыскасы, секстин ырахаты анын татаалдашуусуна байланыштуу.

●     Мындан тышкары, изилдѳѳчүлѳр оргазм же аны имитациялоо кээ бир түрлѳргѳ кирген ургаачы жандыктарга жупташып жатканда ылайыктуу болуп болбогонун текшерүү менен ѳнѳктѳштѳрдү тандоого мүмкүндүк бере турганын белгилешет. Мисалы, кайырмалар ушундайча жакын байланыштуу аргындашууга жол беришпейт. Адамды кошкондо, түйүлдүк пайда болуусу үчүн ургаачынын оргазмы маанилүү болбогон жандыктарда, бул функция топтун ичиндеги ѳз ара аракеттешүү менен кѳбүрѳѳк байланышып, азырынча жакшы изилденип чыга элек.

2. Эркектин оргазмы эмнелерден турат?

●     Биохимиялык процесстерди коё турсак, оргазмдын белгилери негизинен жыныс мүчѳлѳрүнүн тегерегине топтолот. Эркектердеги эӊ кѳрүнүктүү белгиси— эякуляция, башкача айтканда уретрадан урук суюктугунун бѳлүнүп чыгышы.

●     Оргазм учурунда заара чыгаруучу канал бир нече жолу жыйрылып, жумурткаларда, урук түтүкчѳлѳрүндѳ, простата бездери менен купер бездеринде иштелип чыккан сперма сыртка түртүлүп чыгат. Бул 3 – 5 миллилитр суюктукта болжол менен 120 – 600 миллион сперматозоид болот.

●     Эркек сперманын кынга түшүүсүн жеңилдетүү үчүн рефлекстик түрдө жамбашы менен бир нече ирет түртүү кыймылдарын жасайт. Оргазмдын функциясы тууралуу кененирээк кийин айтып беребиз.

●     Жүрѳктүн согуусу минутасына 160 – 180ге чейин, ал эми дем алуунун жыштыгы — минутасына 40ка чейин жетет. Артериалдык басым жогорулайт. Бардык кѳрсѳткүчтѳр бир нече минутадан кийин нормага кайтат.

●     Кан айлануу тездеп, тери кызарат. Кээ бир эркектердин тѳшүнѳ ысык чыгып кетет.

●     Оргазм учурунда денени аӊ сезимдүү башкаруу жѳндѳмдүүлүгү начарлайт. Булчуӊдар ѳзүнѳн ѳзү жыйрылып, бошоӊдойт.

●     Мээнин сыйлык системасынын негизги элементтеринин бири болгон дофамин, жана эндорфиндердин иштелип чыгуусу кѳбѳйѳт. Ошондой эле илимпоздордун пикири боюнча сперма менен энелик клетканын бири-бирин кѳздѳй жылышына жардам берген гормон — окситоциндин деӊгээли дагы жогорулайт.

3. Эркектерде оргазм канча убакытка созулат? Алардын ортосунда тыныгуулар болобу?

●     Эркектерде оргазм болжол менен 3 секундага созулат. Тагыраагы, анын эӊ интенсивдүү бѳлүгү — сперманын кѳп бѳлүгүнүн эякуляциясы жана башка ачык байкалган кѳрүнүштѳрү ушунча убакыт болот.

●     Бул учурда уретра урук суюктугун 3 – 4 жолу 0,8 секундалык аралык менен түртүп чыгарат, ошондой эле оргазмдын башка белгилери дагы байкалат. Кийинки бир нече секунданын ичинде анчалык курч эмес формада болот.

●     Эркектер, аялдардан айырмаланып, катары менен бир нече жолу оргазм ала алышпайт. Себеби, эякуляциядан кийин рефрактердик мезгил, башкача айтканда убактылуу сексуалдык дүүлүгүүгѳ жѳндѳмсүздүк келип чыгат.

●     Тыныгуунун узактыгы индивидуалдуу мүнѳзгѳ ээ. Эякуляциядан кийин калыбына келүү ылдамдыгы бир эле эркекте түрдүү кырдаалдарда ар кандай болушу мүмкүн.

●     Бирок эркектин жашы ѳткѳн сайын «эс алуу» үчүн убакыт кѳбүрѳѳк талап кылынат. Жаш жигиттерде бул убакыт ондогон минута менен ченелсе, 70 жашка барып калган кишилерде бир нече күнгѳ барышы мүмкүн.

4. Оргазмга жетүү үчүн сѳзсүз эле жыныс мүчѳсүн стимуляциялаш керекпи?

●     Пенис — эркектердин кумарга батуу менен байланышкан башкы жыныс мүчѳсү. Бирок жыныс органдары жалгыз эрогендик зона болуп эсептелбейт. Алардын ордуна (же алар менен чогуу) ошондой эле натыйжага жетүү үчүн башка жерлерди дагы стимуляцияласа болот.

●     Жалпысынан эркек менен аялдын денесинин сезгичтик картасы окшош эле. Изилдѳѳлѳр боюнча, жыныс мүчѳлѳрүн эсептебегенде, ѳнѳктѳштѳрдүн тѳшүн (эмчектерин), жамбашын, анусун жана моюнун стимуляциялоо катуу дүүлүктүрѳт.

●     Булардан сырткары, дененин башка ар кайсы бѳлүктѳрү да сезгич зона боло алат — баары жекече ѳзгѳчѳлүктѳргѳ байланыштуу. Жыныстык катнаш учурунда аталган аймактарды сылап-сыйпоо мастурбацияга салыштырмалуу алда канча таасирдүү келет.

●     Оргазмга жетүүдѳ простата бездерин массаждоо дагы абдан натыйжалуу ыкма болуп эсептелет. Ошентип, пенис менен эч кандай катнашка кирбей туруп эле оргазмга жетүү мүмкүн.

●     Айта кетчү нерсе, кээде эркек киши денесинин эч кайсы бѳлүгүнѳ тийбеген учурда, уктап жатканда эле оргазм ала алат. Бул кубулуш поллюция деп аталат жана кѳбүнчѳ ага ѳспүрүмдѳр кабылат. Поллюциялардын максаты — организм дүүлүгүп, бирок оргазм алынбаган учурда жыныстык разрядка жасоо.

●     Анткен менен, сексологдор, поллюцияларды оргазм эмес, эякуляциянын бир формасы катары карашат. Физикалык катнашсыз аӊ сезимдүү кульминацияга жетүү бир топ кыйын. ЖМКларда жана илимий-популярдуу адабиятта эркек кишинин эч кандай тийүүсүз, кармалоосуз эле оргазмга жетүүсүнѳ байланыштуу кѳптѳгѳн баяндар бар. Бирок бул темада аткарылган илимий изилдѳѳнү таба алган жокпуз.

5. Оргазмдын күчүнѳ эмне таасир этет, аны кантип күчѳтүүгѳ болот?

●     Денеде кѳп санда эрогендик зоналар бар. Алардын сезгичтиги индивидуалдуу мүнѳздѳ болуп, түрдүү абалдарда түрдүүчѳ ѳзгѳрѳ берет. Ошондуктан эксперимент жасоодон коркпош керек: бир эле зонаны жагдайды ѳзгѳртүп стимуляциялап кѳрсѳ болот.

●     Жагдайдын алмашуусу жыныстык катнаштын жүрүшүнѳ да таасир этет: секстин стадиялары ар кандай убакытка созулуп, ага карата эмоционалдык жооп да ѳзгѳрѳт. Демек, бул сексуалдык таасирлердин күчѳшүнѳ жардам берет.

●     Оргазмды күчѳтүүгѳ узакка созулган сылап-сыйпоолор дагы таасир этиши мүмкүн. Баарынан жакшы натыйжаны жыныс мүчѳлѳрүнѳ тийбестен, башка эрогендик зоналардын узакка созулган (10-15 минута) стимуляциясы да бере алат. 

●     Сексуалдык таасирленүүнү күчѳтүүнүн дагы бир ыкмасы — америкалык гинеколог Арнольд Кегель иштеп чыккан кѳнүгүүлѳрдүн жардамы менен чычаӊ-куймулчак булчуӊун машыктыруу.

●     Кээде адистер бул кѳнүгүүлѳрдү жыныстык жашоонун сапатын жакшыртуу максатында эркектерге да, аялдарга да сунуш кылышат.

●     Керектүү булчуӊ — заара чыгарууну токтотуу үчүн түйүш керек болгон булчуӊ. Кѳнүгүүлѳрдүн катарына жай темпте ырааттуу түйүү жана бошоӊдотуу, же болбосо, тескерисинче, абалдарды максималдуу түрдѳ тез алмаштыруу аракеттери кирет.

III бѳлүк. Аял оргазмы

1. Эволюциялык жактан караганда аялдардын оргазмы

Космоско биринчи киши алтымышынчы жылдары эле учкан, ал эми окумуштуулар ушул күнгѳ чейин аялдардын оргазмы эмне үчүн керек экендигин так айта албай келишет.

Оргазм репродуктивдик процессте кандайдыр бир роль ойнойт деген болжолдоо ылайыктуураак болмок. Бирок түйүлдүк оргазм жок деле пайда болот да.

Ой жоруулардын бири вагиналдык булчуӊдардын жыйрылышынын сперманын «сорулуп алынышына» жол ача турганы менен байланыштуу болгон. Кийинчерээк окумуштуулар соруп алуу таасири келип чыккан учурда деле ал билинер-билинбес даражада болорун далилдеп чыгышкан.

Оргазм аялдын жыныстык катнашка андан кандай ырахат ала турганын билүү менен баруусу үчүн мотивация катары да каралган.

Кѳпчүлүк сүт эмүүчүлѳрдѳн айырмаланып, адамдын тѳрѳтү кооптуу жана катуу оору менен коштолот. Ошондуктан, оор тѳрѳткѳ алып келиши мүмкүн болгон сексуалдык байланышка кирүүдѳн мурун, аялга, балким кошумча мотивация керектир. 

2016-жылы дагы бир башка теория жаралды: аялдын оргазмы — бул эволюциялык табылга эмес, тескерисинче, атавизм. Себеби, регулярдуу жана кошумча шарттардан кѳз каранды болбогон овуляция салыштырмалуу кийин эле пайда болгон.

Айрым ургаачы сүт эмүүчүлѳрдѳ азыркыга чейин овуляция жупташуу учурунда гана же болбосо жакын жерде эркеги турганда гана болот.

Ушул себептүү окумуштуулар аялдардын оргазмы башында энелик клетканын ѳрчүп жетилишинин белгиси болгондугун, андан кийин бул функциясынан ажырап, жѳн гана жагымдуу толуктоо болуп калганын болжошууда.

2. Аялдарда оргазмдын кандай түрлѳрү болот?

●     Аялдарда оргазм катары менен бир нече жолу болушу мүмкүн. Канаданын МакГилл университетинин психологдору муну психиканын ѳзгѳчѳлүктѳрү менен байланыштырган. Изилдѳѳчүлѳр 38 эркек менен 38 аялдан лабораторияда мастурбация жасоону ѳтүнүшкѳн.

●     Окумуштуулар оргазмга чейин жана оргазмдан 15 минутадан кийин катышуучулардын жыныс мүчѳлѳрүнүн температурасын ѳлчѳп, психологиялык абалын баалап чыгышкан. Эркектерде оргазмдан кийин дароо эле дүүлүгүү азайып, аларда кѳбүрѳѳк субъективдүү сексуалдык канааттануу байкалып, процесске болгон кызыгуу дароо жоголгон.

●     Аялдарда жыныс мүчѳсүндѳгү температура тѳмѳндѳгѳн, бирок психологиялык дүүлүгүү абалы сакталып турган. Изилдѳѳчүлѳр алардын процессти улантууну каалоосу бир нече жолу оргазм алуусуна ѳбѳлгѳ болот деген жыйынтыкка келишкен.

●     Мурун аялдар оргазмдын эки: клитордук жана вагиналдык (кындык) түрүн сезе алат деп эсептешкен. Ошону менен бирге эле кынга жыныс мүчѳнүн, фаллоимитатор же бармактардын кирүүсү аркылуу вагиналдык оргазмга аялдардын үчтѳн бир бѳлүгү гана жете алат.

●     Бүгүнкү күндѳ окумуштуулар «вагиналдык» оргазм деле баары бир клитор менен байланыштуу экенин белгилешет. Тек гана жыныстык катнаш учурунда клитор сыртынан эмес, ич жагынан стимуляцияланат. Анткени, клитор – ички орган, жана сыртта анын башы гана жайгашкан.

●     Ушул себептен улам айрым кыздар заара кылып жатканда дүүлүгүүгѳ кабылышат: суюктуктун агымы клитордун ички бетин стимуляциялайт.

●     Клитордук оргазм кыйла жеӊил: ага клитордун сырткы бѳлүгүн стимуляциялоо аркылуу жетүүгѳ болот.

●     Популярдуу адабиятта жатын оргазмы деген түшүнүк дагы кездешет. Ал жатын дүүлүгүп, кычышкан учурда анын жыйрылуусунан келип чыгат. Жатын оргазмы тентиме нерви жатын моюнчасына жакын жайгашкан аялдарда болушу мүмкүн деп айтылат. Оргазмдын бул түрү жѳнүндѳ илимий изилдѳѳлѳрдѳн эмес, аны башынан ѳткѳргѳн аялдардын баяндарынан белгилүү болгон.

●     Аялда оргазм жыныс мүчѳсүнѳ тийбей туруп, эрогендик зоналарын – маселен, эмчек үрптѳрүн стимуляциялоонун натыйжасында деле келип чыгат. Мында деле ал баары бир дүүлүгүүдѳн улам жамбаш түбүнүн булчуӊдарынын жыйрылуусун пайда кылган клитор менен байланышта болот.  Аналдык секстен алынган оргазм тууралуу деле ушуну айта алабыз – процессте кайрадан эле клитор роль ойнойт.

●     Эркектер сыяктуу эле, аялдар да уктап жатып сексуалдык разрядкага кабылышат. Бул болсо оргазмга эрогендик зоналарды стимуляциялабай туруп эле жетүү мүмкүн экенин кыйыр түрдѳ далилдеп турат. Ал тургай, адам уктабай, эч кандай эротикалуу жагдайга туш болбой эле оргазм алган учурлар да болот. Албетте бул ѳтѳ эле жагымсыз. Илимпоздор мындай абалды талма оорусу же айрым дары-дармектердин кыйыр таасирлери менен байланыштырышат.

3. G чекити: барбы же жокпу

●     Изилдѳѳчүлѳр табиятта G чекити деген кубулуштун бар же жок экенине байланыштуу тартышып келет. G – немец гинекологу Эрнст Грефенбергдин фамилиясынын биринчи тамгасы. Ал 1980-жылдары аялдардын эрогендик зоналарынын парауретралдык бездердин жайгашуусу менен болгон байланышы тууралуу айткан.

●     Анын айтымында, жыныс кынынын алдыӊкы дубалын кындын киришинен 5-8 см тереӊдикте стимуляцияласа, аял ырахат алат.

●     Кийинки изилдѳѳлѳр бул феноменди түшүндүрүп, далилдеп бере алган жок. Ар кайсы илимпоздордун эмгектеринде G чекити ар башка жерлерде кѳрсѳтүлгѳн, же мындай чекиттердин кѳп экендиги, же болбосо ал чекит эмес, ири бир участок экени белгиленген. 

●     Тек гана жыныс кынынын дубалдарын стимуляциялоодо маанилүү ролду аялдын дүүлүгүү даражасы ойногонун так айта алабыз.

●     Эгер аял жетиштүү даражада дүүлүкпѳсѳ, анда G чекитин табуу кыйынга турат – жыныс мүчѳсүнүн бул аймагы стимуляцияга даяр болбой калышы ыктымал.

●     Кандай болсо да, аялдын жыныстык жашоодо кумарга батуусунун башкы себепкери – бул клитор. Анын оргазмга жетүүдѳгү мүмкүнчүлүктѳрүн эске ала турган болсок, анда G чекитин стимуляциялоо сыяктуу кошумча ыкмалар экинчи планга жылат.

4. Аялдагы эякуляция деген эмне

●     Аялдагы эякуляция  - жыныстык стимуляция учурунда жыныс мүчѳсүнѳн ак суюктуктун агып чыгышы.

●     Бул кубулуш жѳнүндѳ алгачкы маалыматтар байыркы даостордун, индиялыктардын жана гректердин тексттеринде кездешкен. Бирок азыркыга чейин мунун так илимий аныктамасы жок.

●     Бүгүнкү күндѳ айрым изилдѳѳчүлѳр аялдын эякуляциясы уретраны курчап турган бездерден — Скин бездеринен улам ишке ашарын айтышат. Ал эми суюктук кандайча пайда болору азырынча белгисиз. Биохимиялык анализ анын заара эмес экенин кѳрсѳтсѳ, кээ бир илимпоздор суюктуктун курамы боюнча эркектердин простата бездеринде пайда болгон суюктукка окшош экенин белгилешет.

●     Эякуляция сквиртинг — кѳп ѳлчѳмдѳгү сийдиктин чачырашы менен бир мезгилде болушу мүмкүн. Эреже катары, ал парауретралдык бездерден агып чыккан суюктуктан кыйла кѳбүрѳѳк болот. 

●     Илимий адабиятта аялдардагы эякуляциянын ондогон гана учурлары так жана толук сыпатталган. Анткен менен, сурамжылоолордун жыйынтыктары боюнча, бул кубулуш кѳп эле кездешери маалым болду: түрдүү изилдѳѳлѳргѳ катышкан аялдардын 10%дан 54%га чейинки бѳлүгү мындай абалга туш болгонун билдиришкен. Сквиртинг кубулуш катары андан да начарыраак изилденген. Илимпоздор айрым учурларда ал табарсык ооруларына байланыштуу боло турганын болжошот.

5. Аялдын оргазмын кантип күчѳтүүгѳ болот

●     Физиологияга гана кайрыла турган болсок, анда бир нече сунуш бере алабыз.

●     Аялдардын сексуалдык саламаттыгын изилдѳѳ боюнча эл аралык коом тарабынан жүргүзүлгѳн изилдѳѳгѳ ылайык, бир нече жолу оргазмга жетүү мүмкүндүгү стимуляциянын ыкмасын ѳзгѳрткѳн учурда жогорулайт. Мисалы, оргазмга жеткенден кийин, клиторду басуу күчүн жана кыймыл-аракет ритмин ѳзгѳртсѳ болот.

●     Эркектердегидей эле, оргазмдын күчүнѳ узакка созулган алдын ала сылап-сыйпоолор, эркелетүүлѳр таасир этет. Мында ѳнѳктѳш жыныс органдарына жакындабайт жана 12-15 минутадан кийин гана аларды стимуляциялай баштайт.

●     Сексуалдык таасирленүүнү күчѳтүүнүн дагы бир жолу — 1950-жылы америкалык гинеколог Арнольд Кегель тарабынан сунуш кылынган кѳнүгүүлѳрдү аткаруу. Алар тууралуу эркектин оргазмы жѳнүндѳгү бѳлүмдѳ жазганбыз.

●     Бирок, эркектерге караганда аялдар үчүн ѳнѳктѳшкѳ жакындык, ошондой эле сезгич зоналардын индивидуалдуулугу, чѳйрѳ, жагдай жана маанай сыяктуу тышкы факторлор да маанилүү.

●     Кындык оргазмга (чынында — клитордук) жыныс мүчѳсүнүн же секс-оюнчуктун башын кындын алдыӊкы дубалына кыпчып, тереӊ эмес фрикциялар менен стимуляциялоо аркылуу жетүү мүмкүн.

●     Клиторду кыйыр түрдѳ, жыныстык катнаш учурунда пенис клиторго сүрүнѳ турган ылайыктуу позаларды тандоо менен стимуляцияласа болот. Мындай оргазмга аял клиторунун башы кындын киришине жакын жайгашкан индивидуалдуу ѳзгѳчѳлүктѳргѳ ээ болгон учурда жете алат.

●     Аялдар эч кандай эротикалуу себепсиз эле оргазм алган учурлар дагы белгилүү. Мисалы, бир айым тишин тазалаган соӊ оргазм алган. Окумуштуулар жѳн жерден оргазмга жетүү боюнча изилденген окуяларды талма оорусунун белгилери менен байланыштырышат.

●     Же болбосо мындай абалга жаӊы муундагы антидепрессанттардын кыйыр таасиринен улам кабылышы ыктымал. Бирок, эреже катары, антидепрессанттар либидонун тѳмѳндѳшүнѳ гана таасирин тийгизбестен, оргазмга жетүү жѳндѳмдүүлүгүн дагы азайтышат.

●     Эгерде аял церквикалдык (жатындык) оргазмды сезе алса, анда кындын кыскаруусун шарттаган атайы позалар аркылуу ага жетсе болот. Мындай позаларга аял эркектин үстүнѳ тизесин бүгүп отурган же буттарын ичине кыскан миссионердик поза кирет.  

Материалды даярдаган: Двор Медиа